سؤال تهزه الارض

سألني ابني وقال

يا والدي

متر الوطن بكام

وكان السؤال مطرقه

ضربته تهز جبال

يا ابني

متر الوطن بتمن

بس التمن كيال

واللي باعوه اندال

متجردين من الذمه

خانوا جموع الامه

سرقونا وسط الزحمه

سجنونا فى قلب وحلة

وقفلوا علينا البيبان

وصرخوا في السجان

اضرب بلا رحمه

وقالولنا مين انتم

دي ارضنا احنا

نبورها ونبيعها

واحنا اللي من لونها

وملامحنا تشبهها

ورويتنا من نيلها

مساجين لحكامهما

قبل الزمان بزمان

دى بلدى وانا ابنها

عايش علي ارضها

بشهدها ومرها

والمر زاد الصبر

والصبر زاد المر

وانا من الاتنين موجوع

وفي قلبي غصه الم

وصوتي مش مسموع

شايف ولادك يا بلدى

متألمين من الجوع

وانتي اللي فيكي الخير

ينبوع ومش مقطوع

وعلي حدودك حارس

واقف ومش خايف

ولا كنت يوم مجبور

حالف يمين الوطن

أسد كسور وجسور

انا دمي ليكي رخيص

وان مت يرويكي

يسري علي ارضك

يطرح جناين شوك

يعادي اعاديكى

وروحي مرفرفه في اعلامك

موحده بالله

صاينه اراضيكي

تحميكي تفديكي

سايبلك ابني

ضنايا من دمي ولحمي

خطاه علي دربي

مولود ليكي عشان يحميكي

يحمي اراضيكي

ووصيتي كتبتها علي علمك

بدمي اللي فداء ارضك

يا ابني

متر الوطن بالدم

ومهما شفت الهم والجوع وقهر وظلم

وصيتى يابنى

تحمي الوطن بالدم